২০২৫ৰ পৰীক্ষাত উত্তীৰ্ণ ছাত্ৰ-ছাত্ৰীৰ বাবে শিৱসাগৰত বিশেষ সম্বৰ্ধনা অনুষ্ঠান
২০২৫ বৰ্ষৰ সদ্যঘোষিত উচ্চতৰ মাধ্যমিক আৰু হাইস্কুল শিক্ষান্ত পৰীক্ষাৰ ফলাফলত উত্তীৰ্ণ হোৱা ছাত্ৰ-ছাত্ৰীসকলৰ প্ৰতি আন্তৰিক অভিনন্দন জ্ঞাপন কৰিছে দৰবাৰ ৰোড যুৱ সমাজ আৰু দৰবাৰ ৰোড মছজিদ পৰিচালনা সমিতিয়ে।
আজিৰ দিনটো শিৱসাগৰ জিলাৰ বাবে গৌৰৱৰ দিন হৈ পৰে, কিয়নো এই জিলা অন্তৰ্গত বহু কেইগৰাকী ছাত্ৰ-ছাত্ৰীয়ে উত্তীৰ্ণ হৈ সুখ্যাতি লাভ কৰিছে। এই সুখবৰ উদযাপন কৰিবলৈ দৰবাৰ ৰোডত আয়োজিত এক বিশেষ অনুষ্ঠানত চি.বি.এছ.চি. আৰু ছেবা বৰ্ডৰ অধীনত অনুষ্ঠিত হাইস্কুল আৰু উচ্চতৰ মাধ্যমিক পৰীক্ষাত সফল হোৱা ছাত্ৰ-ছাত্ৰীসকলক মানপত্ৰ আৰু গামোচাৰ জৰিয়তে বিশেষভাৱে সম্বৰ্ধনা জনোৱা হয়।
এই গৰিমাময় অনুষ্ঠানত জিলাখনৰ বিভিন্ন সমাজসেৱী, শিক্ষাবিদ, ধর্মীয় নেতা তথা বহু গণ্যমান্য ব্যক্তি উপস্থিত থাকে। তেখেতসকলে নিজৰ মূল্যবান বক্তব্যৰ জৰিয়তে উত্তীৰ্ণ ছাত্ৰ-ছাত্ৰীসকলক আগলৈ সমাজ আৰু জাতিৰ উন্নতিৰ বাবে দায়িত্বশীলভাৱে আগবাঢ়ি যাবলৈ উৎসাহিত কৰে।
অনুষ্ঠানখনত উপস্থিত ছাত্ৰ-ছাত্ৰীসকলে এই আদৰণিৰে যথেষ্ট আনন্দিত হোৱা বুলি প্ৰকাশ কৰে আৰু তেওঁলোকে এই সফলতাক সাময়িকভাৱে নহয়, আগন্তুক জীৱনৰ দিশত এক সুদৃঢ় পদক্ষেপ হিচাপে লৈ আগবাঢ়ি যোৱাৰ সংকল্প গ্ৰহণ কৰে।